Gisang-at ni Senate President Pro Tempore Panfilo Lacson ang Senate Bill No. 1725 nga usa ka dakong tabang alang sa pagpauswag sa benepisyo ug kondisyon sa pagtrabaho ngadto sa mga sanitation inspectors (SI) sa Department of Health.
Gisugyot sa maong balaodnon ang paghatag ug hazard allowance nga mokabat sa Php1,000 matag bulan, laundry allowance nga Php500 matag bulan, subsistence allowance nga Php200 matag adlaw ingon man sa transportation allowance nga Php1,000 matag bulan.
Tumong niini aron sa paghatag ug taas nga suweldo pinaagi sa pag-usab sa salary grade schedule ug sa mandatory nga rehistrasyon ug akreditasyon sa mga sanitation inspectors sa lokal nga health boards.
Gani, ang mga nakaserbisyo nga SI sa kapin 10 ka tuig adunay one-time gratuity incentive nga mukabat sa Php10,000 ug adunay 20% discount privileges susama sa gihatag ubos sa Expanded Senior Citizens Act of 2010.
Gawas pa sa taas nga sweldo ug mga allowance, ang maong balaodnon naghatag usab ug programa sa edukasyon ug pagpauswag sa karera alang sa mga akreditado ug rehistradong sanitation inspectors.
Samtang sa pikas bahin, adunay silot o multa nga gitanyag alang sa makalapas sa maong bill, diin mukabat sa Php50,000 hangtod na sa Php500,000 ingon man sa pagkakulong gikan sa usa ngadto na sa lima ka tuig.
Photo Courtesy: Philippine News Agency
