Posibleng masuspinde ang suweldo ni Sen. Ronald “Bato” dela Rosa tungod sa dugay na niya nga pagliban sa mga sesyon sa Senado, sumala ni Senate President Pro Tempore Panfilo Lacson niadtong Martes.
Matud ni Lacson, gitun-an na karon sa kadumalahan sa Senado ang pag-amendar sa Senate Rules aron tugotan ang withholding o pagpugong sa suweldo sa usa ka senador nga dugay na nga wala magpakita sa trabaho.
Si Dela Rosa wala na motambong sa mga plenary sessions sukad pa niadtong Nobyembre 11, 2025, human migawas ang pamahayag gikan sa Ombudsman nga duna arrest warrant ang International Criminal Court (ICC) batok kaniya, bisan pa man kon wala pa kini opisyal nga kumpirmasyon. Sumala ni Lacson, kinahanglang tun-an og maayo ang legal nga basehan niini nga lakang tungod kay ang mga senador sakop man sa civil service law.
Bisan pa niana, gihisgutan niya nga mahimong morekomenda ang Senate ethics committee og ingon niini nga parusa, nga mahimo usab nga ipatuman kon aprobahan na sa plenaryo. Gibutyag usab ni Lacson nga duna’y plano si kanhi Sen. Antonio Trillanes IV nga mopasaka og ethics complaint batok kang Dela Rosa karong Marso, nga mahimong dalan aron moaksyon ang ethics committee.
Sa usa ka bulag nga pamahayag, niingon si Lacson nga dili siya moapil sa bisan unsang posibleng silot batok kang Dela Rosa tungod kay, matod pa niya, wala siya’y moral authority sanglit nakasinati usab siya og susamang sitwasyon kapin 15 ka tuig na ang milabay.
Photo courtesy: Senator Ronald “Bato” Dela Rosa/ Facebook
