Gipasigarbo sa Malacañang nga naa sa saktong dalan ang ekonomiya sa nasod, gumikan nagpabiling buhi ug positibo ang dagan sa ekonomiya ubos matod pa sa administrasyon ni Presidente Ferdinand Marcos Jr.
Gibutyag ni Palace Press Officer USec. Claire Castro nga dako usab og tabang ang gipatuman nga economic reforms sa administrasyon. Kini base sa report sa economic team ngadto sa Presidente atol sa 7th Economy and Development Council Meeting nga gipahigayon sa Malacañang.
Gipadayag ni Castro nga ang unemployment rate mius-os gikan sa 10.3% sa 2020 ngadto sa 4.7% sa 2025, samtang ang underemployment rate mius-os usab gikan sa 16.2% ngadto sa 13.6% sa miaging tuig, nga nagpakita sa pagsaka sa mas angay ug desente nga trabaho alang sa mga Pilipino.
Gihatagan og gibug-aton sa opisyal sa Palasyo nga ang mga datus nagpakita usab nga epektibo ang mga programa sa gobyerno sa pagmugna og mga trabaho ug pagkunhod sa kakabos.
Base sa datus, ang ihap sa mga kabus mius-os usab og 2.4 milyones ka tawo gikan sa 2021 ngadto sa 2023, samtang ang inflation rate sa nasud nagpabilin nga manageable.
Dugang pa nga ang direktiba sa Presidente ngadto sa mga hingtungdan nga ahensya sa gobyerno aron matubag ang mga isyu sa flood control, climate change, ug uban pang mga hagit sa gawas nagpabilin nga estrikto, kauban ang mas maayo nga paggamit sa mga pondo sa publiko ug pagpalig-on sa relasyon sa ekonomiya sa ASEAN.
Photo Courtesy: Jhon Clemente Consultants
