Gimanduan na ni Mayor Rolando Uy sila si City Economic Enterprises Business Development Administration (CEEBDA) Manager Atty. Marianne Ragas ug City Health Officer-in-Charge Dr. Claire Paglinawan nga hinanaling magpahigayon og imbestigasyon may kalabutan sa gikatahong kaso sa leptospirosis sulod sa Cogon Public Market.
Una na nga gipaabot kini nga problema sa konseho kung asa matod pa, aduna nay napulo ka namatay human natapnan sa sakit nga leptospirosis.
Apan sumala pa sa City Health Office mga wala pay natala nga namatay sa leptospirosis kung basehan ang mga death certificates nga miagi sa ilahang buhatan, busa padayon pa nila kining gina-verify.
Sa pikas bahin, sa pagbisita sa Juander Radyo News Team kang CEEBDA General Manager Atty. Marriane Ragas, iyang gikakurat ang matod pa napulo ka kaso sa namatay tungod sa ilahang kasayuran, usa lang ka stall owner ang bag-ohay lang namatay nga gikatahong natapnan sa leptospirosis.
Giisip ni Atty. Ragas nga usa kini ka isolated case ug gipasalig sa publiko nga luwas ra ang pagpamalengke sa Cogon. Padayon ang ilahang hugot nga koordinasyon ngadto sa City Health Office aron nga maverify ang tinuod nga ihap sa mga natapnan sa leptospirosis ug aron nga dili na madugang pa ang mga biktima sa sakit.
Hangyo sab niya sa tanan nga magpakabana sa panglawas tungod kay kini nga health concern dili lamang tulubagon sa panggamhanan apan sa matag usa.
