Ginasugyot karon ang paglakip sa gitawag nga “super wet ug super dry season” sa climate cycle nga pagabantayan dinhi sa atong nasod.
Sumala ni Climate Change Commission (CCC) Senior Commissioner Albert dela Cruz, dili na lang ordinaryo nga ting-init ug ting-ulan ang nasinati sa nasod base sa na obserbahan sa milabayng mga tuig.
Matod pa sa opisyal, gawas sa “dry” ug “wet” season, kinahanglan na usab nga ikonsidera ang “super dry” ug “super wet” season sa paghimo og mga polisiya nga adunay dakong epekto sa pagtubag sa problema sa klima.
Gibutyag sa CCC nga makig-alayon sila sa Philippine Atmospheric, Geophysical and Astronomical Services Administration (PAGASA) bahin niini, lakip na sa uban pang mga sanga sa kagamhanan.
Kini tungod kay kung kaniadto kasagaran nga baha lang ang masinati kon ting-ulan, karon adunay mga higayon nga tibuok bulan na nga bahaon ang pipila ka parte sa nasod. Samtang kon ting-init usab, grabeng pagpauga sa yuta sulod sa mas taas nga gidaghanon sa mga adlaw ang mahitabo.
Photo courtesy: Business Mirror
