Nahasol, giluod ug gikapoy na ang mga lumulupyo sa Opol, Misamis Oriental partikularmente sa Brgy. Bonbon, Brgy Patag ug mga kasikbit pa nga mga Barangay tungod sa purwisyo ug peligro sa ilang panglawas sa pagdagsa sa mga langaw sa ilang mga panimalay.
Usa ka concerned citizen ang nagpadala og video sa pag dagsa sa mga langaw sa Juander Radyo Newsteam ug dali dayon nga miimbistigar sa lugar kini nga sibyahan ug personal nga nakita ang makalilisang nga dagsa sa mga langaw.
Sa pakighinabi sa Juander Radyo Newsteam sa pipila ka mga residente sa Brgy. Bonbon, Opol nga maglisod na sila og kaon tungod sa kadaghan sa mga langaw ug gikabalak-an nga basin masakit ang ilang mga anak tungod sa peligrong dala sa mga langaw.
Lakip sa gibasol sa mga residente sa pagdagsa sa mga langaw ang usa ka poultry farm nga nahimutang sa Zone 8, Brgy Bonbon, Opol nga pinakaduol sa mga kabalayan, rason nga amo usab kining gi-adtoan, apan tubag sa kadumalahan, wala sila nagpasagad.
