Gisubli sa Department of Labor and Employment – Regional Office X (DOLE-X) ang pahibalo nga ang ₱25 nga wage increase alang sa Wage Category 1 opisyal nga gipatuman sugod niadtong Enero 16, 2026.
Sumala sa ahensya, ang maong pagtaas sa suholan kabahin sa lakang sa gobyerno aron mapalambo ang kahimtang sa panginabuhian sa mga minimum wage earners ug masiguro ang patas ug makiangayon nga suholan tali sa mga mamumuo ug employer.
Ang Wage Category 1 naglakip sa non-agricultural establishments, retail, ug service establishments nga adunay 10 o labaw pa ka mga trabahante, samtang ang Wage Category 2 naglakip sa agricultural establishments, retail, ug service establishments nga adunay ubos sa 10 ka mga trabahante.
Gikabutyag ni Kim Jame S. Bangcong, Labor Employment Officer III sa DOLE Bukidnon, atol sa eksklusibong pakighinabi sa Juander Radyo Malaybalay, nga dili angay kabalak-an sa mga empleyado kung wala dayon matuman ang wage increase sa ilang trabahoan. Gidugang niya nga adunay mga Labor Inspector nga magpatuman og inspection ug survey aron masuta kung nisunod ba ang mga employer, ug ang dili pagsunod mahimong mosangpot sa kaso batok sa employer.
Sakop sa maong wage order ang tanang probinsya ug highly urbanized cities sa Region 10, lakip ang Bukidnon, Misamis Oriental, Misamis Occidental, Lanao del Norte, Camiguin, ug Cagayan de Oro City.
Gidasig sa DOLE-X ang mga employer nga mo-coordinate sa pinakaduol nga DOLE Field Office alang sa klaripikasyon, samtang gi-awhag ang mga trabahante nga motaho dayon kung adunay paglapas sa wage order.
Photo Courtesy:DOLE-10
