Nagpadayon ang Department of Social Welfare and Development (DSWD) Region 10 sa pagpahigayon og Family Development Session (FDS) aron mapalambo ug mapalig-on ang mga ginikanan ug estudyante nga benepisyaryo sa Pantawid Pamilyang Pilipino Program (4Ps).
Sumala sa ahensya, duha ka benepisyaryo sa Region 10 ang nalakip sa top 10 passers sa usa ka bag-ong licensure examination, usa ka pamatuod sa kaayohan sa programa.
Matod ni Oliver Badel Inodeo, 4Ps Information Officer sa DSWD-10, pinaagi sa FDS, gitudloan ang mga ginikanan sa responsableng pagdumala sa panimalay, hustong pag-atiman sa kahimsog ug edukasyon sa ilang mga anak, ug pagpalig-on sa mga moral nga bili sama sa pagpangaliya sa labawng makagagahom, pagkamatinud-anon, ug pagkamapainubsanon.
Makahinungdanon kaayo nga hatagan ug bili sa benepisyaryo ang tabang nga gihatag sa gobyerno, bisan pa man kini gamay, aron mapalambo ang edukasyon ug kinatibuk-ang kaayohan sa mga kabataan nga sakop sa programa, matod pa ni Inodeo.
Gipasabot sa DSWD nga ang kalampusan sa 4Ps dili lamang nagsalig sa pinansyal nga tabang, kondili nag-agad usab sa aktibong partisipasyon ug kooperasyon sa mga ginikanan alang sa mas hayag nga kaugmaon sa ilang mga kabataan.
Photo Courtesy: DSWD-10
