Gibutyag ni Criminal Investigation and Detection Group Director Maj. Gen. Robert Alexander Morico II nga aron nga mapadali ang manhunt operation, ila matod pang girekomenda kang PLTGEN. Jose Melencio Nartatez Jr. ang pagrevoke sa lisensya sa armas ni Atong Ang kinsa nag-atubang ug kaso may kalabutan sa kidnapping with homicide kabahin sa mga missing sabungeros.
Kini ang gipadayag ni Maj. Gen. Morico atol sa usa ka press briefing sa Quezon City niadtong Huwebes, Enero 15, 2026. Gani, base usab sa rekord sa PNP, unom ka armas ang narehistro ubos sa ngalan ni Atong Ang.
Dugang pa sa opisyal nga sila nakigkomunikar na sa mga abogado ni Ang ug gimandoan silang i-surrender ang mga armas ngadto sa Firearms and Explosives Office.
Subay niini, niadtong Miyerkules nagpagawas ug warrant of arrest ang Sta. Cruz, Laguna Regional Trial Court Branch 26 batok kang Ang kinsa sa karun nagpabilin pa nga gawasnon, samtang ang 17 ka kauban niini gikustodiya na sa Criminal Investigation and Detection Group (CIDG).
Sa pikas bahin, gibutyag ni Gabriel Villareal kinsa abogado ni Ang nga ang mando sa korte kwestyonable matod pa ug wala pa kini sa tukma nga panahon.
Photo Courtesy: Philippine News Agency
