Gipasigarbo ni DPWH Secretary Vince Dizon ang paspas ug hapsay ug koordinadong paningkamot sa mga national ug local nga opisyal human opisyal giablihan sa mga motorista ug biyaheros ang bag-ong dalan sa Bukidnon-Davao City Road via BUDA, didto sa Sitio Kipolot, Barangay Palacapao, Quezon, kagahapon, Enero 14, 2025
Atol sa press conference, giingon ni Secretary Dizon nga kon limpyo ug walay korapsyon ang budget sa proyekto, mas dali ug pulido ang trabaho sa imprastraktura, labina sa mga dalan nga kritikal sa kaluwasan ug ekonomiya sa katawhan.
Naglaum ang DPWH nga ang bag-ong dalan makatabang sa pagbalik sa normal nga dagan sa trapiko ug makapamenos sa risgo sa aksidente samtang padayon ang long-term nga solusyon.
Gidayeg sa opisyal ang paspas nga aksyon pinaagi sa kolaborasyon uban nila Senator Juan Miguel Zubiri, Governor Rogelio Roque, Municipal Mayor Poling Lorenzo, DPWH Region 10, ug uban pang stakeholders.
Una nang gikasubo ni Senator Juan Miguel Zubiri ang pagkawala sa Php40 milyon kada adlaw sa agricultural ug tourism sector human sa landslide, tungod kay ang Bukidnon mao ang nanguna nga supplier sa pagkaon sa Northern Mindanao.
Sa pagkakaron, ang physical accomplishment sa maong 4-lane road section nakaabot og 90-95%, nga gipondohan sa DPWH pinaagi sa ₱48.5 milyon gikan sa Quick Response Fund ug gitrabaho sulod sa 90 ka adlaw, diin karong weekend trabahuon ang asphalt overlay nga gigahinan ug ₱20 milyon nga pondo sa DPWH.
Photo Courtesy: MSN
