Misaka ang ranking ni Regie “Filipino Phenom” Suganob sa kalibutan sa boksing human mosaka ang iyang ranggo sa tulo ka dagkong world boxing organizations, duha ka bulan sa wala pa ang iyang sunod nga sangka.
Pagsugod pa lang sa tuig 2026, nagpakita og bag-ong kusog ang Boholano nga boksingero sa dihang misaka siya gikan No. 4 ngadto sa No. 3 sa WBO light flyweight division, misaka og unom ka pwesto ngadto sa No. 5 sa IBF, ug gikan No. 9 ngadto sa No. 8 sa WBC rankings.
Uban sa Kumong Bol-Anon 24 nga gikatakdang ipahigayon Pebrero 28 sa Bohol Cultural Center, anaa na si Suganob sa paborableng posisyon alang sa world title eliminator o posibleng diretsong title fight.
Hinungdanon kaayo ang maong laban alang sa 28-anyos nga boksingero taga-Dauis, Bohol, nga adunay rekord nga 17 ka daog ug usa ka kapildihan, unom niini pinaagi sa knockout. Sukad pa niadtong 2023, gipaningkamotan ni Suganob ang pag-angkon sa world title human siya mapildi pinaagi sa desisyon sa IBF light flyweight champion Sivenathi Nontshinga sa South Africa.
Una nang gipasidaan sa PMI Bohol Boxing Promotions ang pagbalik ni Suganob human sa iyang unanimous decision victory batok kang Mchanja Yohana sa Kumong Bol-Anon 23 niadtong Nobyembre. Opisyal nga gikumpirma ning semanaha nga si Suganob ang mahimong main event sa sunod nga edisyon sa Kumong Bol-Anon.
Sa karon, wala pa gipadayag sa PMI ang ngalan sa kontra ni Suganob sa Pebrero 28, apan gipasalig sa promotor nga kini magagikan sa top 10 contender sa usa sa upat ka dagkong boxing organizations.
Photo Courtesy: Tapology
