Giaprubahan sa Economic and Development Council sa administrasyon ni Presidente Marcos ang hapit Php280.5 bilyon nga mga proyekto sa edukasyon, transportasyon, ug agrikultura aron mapaspasan ang inclusive growth ug mapalig-on ang human capital development.
Sumala sa Department of Economy, Planning and Development (DepDev), giaprubahan sa council niadtong Enero 8 ang mga proyekto nga naglakip sa mga eskwelahan, highways, ug rural connectivity.
Sa edukasyon, apil sa giaprubahan ang Php105.7 bilyon nga Public-Private Partnership for School Infrastructure Project Phase III, nga magtukod og 16,459 ka bag-ong classrooms sa kapin 1,000 ka eskwelahan sa Luzon gikan Marso 2027 hangtod Marso 2028.
Gilauman nga mapahimuslan kini sa 800,000 ka estudyante pinaagi sa pagpakunhod sa average class size gikan 50 ngadto sa 39 ug pagtangtang sa multiple-shift schedules alang sa mga magtutudlo. Kini nga proyekto mopuno sa konstruksyon sa kapin 250,000 ka classrooms sa DepEd ubos sa 2026 national budget, diin nakadawat ang DepEd og record-high nga Php1.015 trillion allocation.
Sa transportasyon, gi-aprubahan ang Php145.56-bilyon nga Central Mindanao High Standard Highway Construction Project, nga konektado ang Cagayan de Oro ug Malaybalay. Kini nga 65-kilometro nga highway mokunhod sa travel time gikan 6.5 ka oras ngadto sa 3.5 ka oras. Apil usab sa proyekto ang pagtukod sa 47 ka tulay, lakip ang siyam ka long-span bridges.
Sa agrikultura, gi-aprubahan ang Php28.24-bilyon nga Pang-Agraryong Tulay para sa Bagong Bayanihan sa mga Magsasaka Bridges Project, nga nagtinguha nga mapataas ang kita sa kapin 350,000 ka pamilya sa agrarian reform communities.
Dugang pa, ang Farm-to-Market Bridges Development Program nga karon nagkantidad og Php27.69 bilyon ipatuman gikan fiscal year 2026 hangtod 2029, gipalapdan gikan sa orihinal nga 2025 hangtod 2028. Ang programa naglakip sa pagtukod sa 300-ka modular steel panel bridges sa 15 ka rehiyon aron mapalambo ang access sa merkado alang sa mga mag-uuma, mangisda, ug mga rural nga residente.
Kini nga serye sa mga proyekto gipanglantaw nga dako ang ikatabang sa pagpalig-on sa ekonomiya sa mga kabaryohan ug sa kinatibuk-ang kahimtang sa nasud.
Photo Courtesy: Philippine News Agency
