Naghangyo og dugang pagsabot ang Cagayan de Oro Water District ngadto sa mga konsumante nga apektado gihapon sa water interruption sa pipila ka mga barangay sa dakbayan.
Kini tungod na sab sa kasuko sa mga konsumante human nakasinati og hinay nga pressure sa tubig hangtud na sa walay agas sa tubig sa ilahang mga lugar.
Kahinumduman nga nakasinati dili lang ang syudad apan lakip na kasikbit nga mga munisipyo tungod sa kusog nga pagbundak sa ulan nga nagresulta sa pagkadamyos sa mga pasilidad sa water supplier sa COWD.
Apan pagpasabot ni Engr. Rhona Kim Ferido, representante sa engineering department sa COWD, nga padayon ang ilahang koordinasyon sa COBI aron nga mapaspasan ang pag-repair sa mga linya sa tubig nga nangadamyos.
Samtang gipangitaan na nila og pamaagi aron masulbad kini, sama sa pagsuplay o pagdeliver og milyong litro sa tubig sa mga komunidad nga wala pay agas. Uban kini sa suporta sa BFP, Climbs ug uban pang organisasyon nga adunay kapasidad maghatod og tubig sa komunidad nga apektado.
Wala misaad si Engr. Ferido og kung kanus-a hingpit nga mabalik sa normal ang ilahang operasyon ug ang ilang bulk water supplier.
Photo courtesy: Cagayan de Oro City Water District
