Walay laing nahimo gawas sa paghilak ang usa sa mga bisita human naugdaw ang iyang mga gamit sama sa bag, ID, ug kwarta sa nahitabong sunog sa Guesthouse sa Monastery of the Transfiguration sa Barangay San Jose, Malaybalay City niadtong nakalabayng gabii.
Sumala ni Ricky Torayno, usa sa mga trabahante sa maong Monastery siya maoy unang nakakita nga adunay wire sa kuryente nga nagpiti-piti hangtod nga mikatap ang kalayo ngadto sa alkoba sa building nga gama sa light materials diin gisulayan nila pagsumpo gamit ang fire extinguisher ug tubig, apan wala nila kini napugngan busa daling nanawag og tabang sa mga otoridad.
Mokabat sa 1.2 milyones pesos ang gibanabanang damyos sa sunog sumala ni FO3 Brent Clyde Suico, ang Spokesperson sa Malaybalay City Fire Station kung asa giisa ang sunog ngadto sa 2nd alarm diin tulo ka fire truck sa Malaybalay ang miresponde. Gituohang electrical wiring maoy nag-unang gilantaw nga tinubdan sa maong sunog.
Tungod niini, nagpahimangno ang buhatan sa Bureau of Fire Protection (BFP) sa katawhan nga dili malimot sa pagtawag dayon sa ilang opisina kon adunay emerhensya aron daling marespondihan.
Photo Courtesy: Malaybalay City Fire Station
