Gipalig-on sa City Health Office (CHO) sa Valencia, uban sa Department of Health (DOH), ang ilang panawagan sa mga ginikanan nga pabakunahan ang ilang mga anak nga nag-edad og 6 ka bulan hangtod 59 ka bulan (4 ka tuig ug 11 ka bulan) batok sa tipdas (measles) ug rubella, isip kabahin sa Expanded Program on Immunization (EPI).
Tumong sa maong programa nga mapalig-on ang panalipod sa kahimsog sa mga kabataan ug malikayan ang pagsaka sa mga kaso sa tipdas ug rubella diin libre kining gihatag sa gobyerno aron masiguro nga tanang kabataan, ilabi na ang mga gikan sa kabus nga sektor diin mahal ang bakuna sa pribadong health facilities.
Sa pakighinabi sa Juander Radyo Malaybalay, gipadayag ni Venadyl Hera Cantero, Health Education and Promotion Officer sa CHO Valencia, nga adunay na’y mga natalang kaso sa maong mga sakit sa rehiyon ug sa probinsya sa Bukidnon busa aron malikayan ang pagkatap niini kinahanglan ang pagbakuna sanglit kung usa ka bata ang matakdan, mahimo kining makatakod og 12 hangtod 18 ka tawo.
Giawhag ni Cantero ang mga ginikanan nga dal-on ang ilang mga anak sa health center gikan Enero 19 hangtod Pebrero 13, diin andam motabang ang mga midwife, nurse, ug Barangay Health Workers (BHWs) alang sa pagbakuna, bisan walay vaccination card, pwede gihapon mabakunahan.
Ang pagpabakuna usa ka lakang sa pagpanalipod sa kahimsog sa mga kabataan, pagpugong sa pagkuyanap sa sakit ug pamatuod sa pag-atiman ug gugma sa mga ginikanan sa ilang mga anak.
Photo Courtesy: CHO—DOH
