Gipirmahan na ni Presidente Ferdinand “Bongbong” Marcos Jr. ang General Appropriations Act (GAA) alang sa tuig 2026 nga adunay kinatibuk-ang kantidad nga Php6.793 trilyon, ang kinadak-ang nasudnong budget sa kasaysayan sa Pilipinas. Gipahigayon ang seremonya sa pagpirma sa Malacañang kagahapong adlawa, Enero 5, 2026 human kini nadugay og gamay tungod sa makuting pagsusi sa ehekutibo.
Matod sa Presidente, ang budget haom sa medium ug long-term development plans sa administrasyon ug nakatutok sa pagpamuhunan alang sa katawhang Pilipino. Dakong bahin sa pondo ang i-gahin alang sa edukasyon, panglawas, seguridad sa pagkaon, social protection, ug pagmugna og trabaho. Gihisgotan usab sa Palasyo nga ang budget magsilbing pundasyon sa mas inklusibong paglambo ug magpalig-on sa ekonomiya taliwala sa mga hagit sa tibuok kalibutan.
Sa unang mga adlaw sa tuig, temporaryong naggamit ang gobyerno og reenacted budget samtang naghulat sa pirma sa Presidente. Sa kinatibuk-an, gilauman nga ang Php6.793 trilyon nga budget maghatag og mas lig-on nga suporta sa mga nag-unang sektor ug mas lapad nga oportunidad alang sa mga Pilipino.
Photo courtesy: RTVM
