Kung abi nimo safe kaayo ang panigarilyo sulod sa kasilyas, sayop ka kaayo—ilabi na kung naa ka sa China.
Sa usa ka shopping center sa Shenzhen, nakahimo og laing klase nga pamaagi ang management aron pugngan ang mga “secret smokers” sa kasilyas. Ang ilang solusyon? Pultahan nga mahimong transparent kung naay aso.
Sa Shuibei International Center, klaro kaayo ang pahimangno sa sulod sa banyo: “Ang panigarilyo makapahimong klaro ang salamin.” Ug dili kini joke.
Kay kon ang sensor sa pultahan makadetect og aso ug kainit sa sigarilyo, ang frosted glass nga gituyo para sa privacy, kalit ra mangahimong klaro. Meaning, gikan sa “private moment,” mahimong public viewing ka sa pipila ka segundo.
Ug dili pa diha kutob. Samtang nagka-transparent ang pultahan, mokalit og tingog ang loudspeaker nga nagaingon nga bawal ang panigarilyo sa public place ug makadaot kini sa kahimsog. Murag bonus announcement para sa kaulaw.
Sumala sa shopping center, kaniadto nagpataw na sila og multa ug ban, pero wa gihapon undang ang panigarilyo sa kasilyas. Mao nga ilang gi-level up ang disiplina: kaulaw kontra sigarilyo.
Usa pa ka pahimangno sa banyo nag-ingon: “Ayaw sigarilyo kon dili ka gusto mahimong internet famous.” Kay basin imbes smoke break, viral break imong makuha.
Ang ideya aron mahadlok sa mga smokers nga makuhaan sila og litrato o video samtang nagbuhat sa ilang “bisyo mission.”
Nag-viral na ang pamaagi sa social media sa China. Ang uban miingon nga epektibo kaayo, samtang ang uban nagreklamo nga pribasiya na pud daw ang natumban.
Sa pagkakaron, klaro ang mensahe sa Shenzhen: Kung gusto ka og privacy, ayaw pagpanigarilyo sa kasilyas. Kay sa ilang banyo, ang aso- makapahimo nimong makita sa tanan.
Photo courtesy: Oddity Central
