Nakigtagbo si Cebu Provincial Governor Pamela Baricuatro ngadto sa mga taxi operators sa lalawigan kagahapon adlawa aron mahatagan og pagtagad ang mga hisgutanan may labot sa dugang nga franchises sa mga taxi ug ingon man sa franchise alang sa mga taxi nga electric vehicles (EVs). Diin gilaraw nga mobiyahe kini, sa Sugbo lakip na ang Metro Cebu.
Nitambong sa maong public hearing mao ang mga representante sa Land Transportation Franchising and Regulatory Board kun LTFRB, electric vehicle operator Green & Smart Mobility kun GSM, League of Municipalities of the Philippines (LMP) Cebu Chapter, sa pagpangulo ni Cordova Mayor Cesar “Didoy” Suan, lakip ang mga transport operators sa Sugbo.
Lakip sa nitambong mao ang mga miyembro sa Sangguniang Panlalawigan, sama ni Board Members Nilo Seno, Julius Anthony “Oloy” Corominas, and Dr. Stanley Caminero kinsa nihatag sab og pagpasabot sa Republic Act No. 11697 kun EVIDA Law o ang Electric Vehicle Industry Development Act.
Nag-unang nahisgutan mao ang plano nga magpasulod sa ride-hailing firm Green and Smart Mobility (GSM) nga nakabase sa Vietnam ug ang dugang 600 slots nga gipagula sa LTFRB alang sa mga electric vehicle (EV) taxi sa Metro Cebu.
Sa iyang bahin, niingon si Gov. Pam nga importante nga mahatagan og higayon ang katawhan nga mabati labot sa maong plano human nasuta nga wala mahatagi og higayon ang mga local taxi operators nga makahibalo labot sa lakang sa LTFRB nga dugang slots.
