Gipahibalo sa Philippine National Police (PNP) niadtong Enero 4 nga nasulbad na niini ang 4,203 ka administrative cases nga naglambigit sa 6,527 ka police personnel sulod sa tuig 2025.
Matod pa ni PNP Chief Lt. Gen. Jose Melencio Nartatez Jr., nga ang maong lakang nagpakita sa kamahinungdanong tahas sa kapulisan ug walay gipili nga kinsang mga indibidwal nga paboran.
Gani, base sa datos sa PNP, ang mga nalambigit nga mga personahe sa kapulisan naglangkob sa 1,101 ka Police Commissioned Officers, 5,229 ka Police Non-Commissioned Officers, ug 197 ka Non-Uniformed Personnel. Sa kinatibuk-ang ihap anaa sa 6,527 ka apektadong personnel, 3,124 ang gi-dismiss sa serbisyo, samtang 3,403 ang gisilotan pinaagi sa demotion, suspensyon, ug uban pang administratibong silot human sa due process.
Kabahin niini, gibutyag ni Nartatez nga ang disiplina maoy pundasyon sa serbisyo sa kapulisan ug magpadayon matod pa ang ilang internal nga mga paningkamot sa paghinlo sa organisasyon.
Dugang pa sa opisyal nga ang kapulisan, usa sa responsilibidad nila mao ang pagpalig-on sa pamatasan, propesyonalismo, ug pagsalig sa publiko ingon man pagpanilipod ug pagserbisyo sa katawhan.
Photo Courtesy: Tempo
