Nagpagawas na og pamahayag ang OPM singer nga si Zack Tabudlo sa social media human makadawat og mga sakit nga komento gikan sa pipila ka netizen kalabot sa iyang performance sa Paskuhan sa University of Santo Tomas (UST).
Nisilaob ang isyu human nikatap ang usa ka TikTok video nga nagpakita sa singer nga dako kaayog singot samtang lagsik nga nag-perform, nga nahimong rason sa mga negatibong saway bahin sa iyang hitsura ug pasangil nga duna kuno siyay dili maayong baho.
Sa usa ka video nga gipagawas niadtong Disyembre 22, gipasabot ni Zack nga dili niya tuyo nga makig-away, kundi hatagan og katin-awan ang kamatuoran nga hilom nga giantos sa daghang mga artista. Matod pa niya, normal lang nga panington tungod sa grabeng lihok, init nga suga sa entablado, ug ang kainit sa palibot samtang nag-perform.
Giangkon sa singer nga sakit gihapon ang mga personal nga mensahe batok kaniya, ilabi na ang mga komento bahin sa iyang hitsura, timbang, ug batasan, bisan pa og dugay na siya sa industriya. Gipaambit usab niya ang iyang kahiubos nga murag mas mahinumdoman pa siya sa publiko tungod sa mga kontrobersiya kaysa sa iyang musika.
Gihatagan og gibug-aton ni Zack ang kuyaw sa social media diin mahimong madaot ang imahe sa usa ka tawo tungod lang sa usa ka viral nga komento o video. Sa pagtapos sa iyang pamahayag, nanawagan siya og “empathy” (pagsabot) ug “kindness” (kamaayo), isip pahinumdom nga ang mga artista tawo raman usab nga masakitan.
Photo courtesy: Zach Tabudlo/ Facebook
