Sa nasod sa Turkey, usa ka bana ang napildi sa kaso sa diborsyo tungod, dili sa kabit, dili sa late nga uli — kundili tungod sa kusog kayo mo react og heart ug care sa social media.
Ang talagsaong kaso nahitabo sa Kayseri, diin ang usa ka babaye nga giila lamang sa inisyal nga Hannah ang misang-at og diborsyo batok sa iyang bana. Sumala sa asawa, kanunay daw siyang ginapakaulawan ug gina insulto sa bana, ug labaw sa tanan, adik kini sa social media — sigeg like sa litrato sa laing mga babaye ug gani magbilin pa og mga komento nga “murag naa pay sunod nga season.”
Gipangayo sa kampo sa asawa ang pinansyal nga bayad, matod pa, nawala ang katungdanan sa bana sa katapatan sa kaminyoon.
Apan wala pud magpada ang bana nga si Samuel. Siya usab misang-at og diborsyo, giingon nga naguba ang iyang dungog tungod sa grabe ka selosa nga asawa, ug giakusahan pa siya nga giinsulto kuno ang iyang pagka amahan.
Human susihon ang duha ka panig, ang korte klaro kaayo ang desisyon — mas dakong sala ang bana. Busa, gimanduan siya sa korte nga mubayad og 750 Turkish lira matag bulan nga alimony, ug 80,000 lira nga bayad-danyos.
Mitawag og “overreaction” ang bana ug miapela, apan wala nausab ang desisyon. Matod sa huwes, ang pag-like ug pag react sa litrato sa laing mga babaye nakadaot sa pagsalig sa kaminyoon — busa klaro kuno ang sayop.
Bisan pa og kataw-anan paminawon, seryoso ang epekto sa kaso. Sumala sa mga abogado sa Turkey, gikan karon pwede na gamiton nga ebidensya ang screenshots, messages, likes, ug comments sa social media sa mga kaso sa diborsyo.
Matod pa sa usa ka abogado, “Maghunahuna na gyud og kaduha ang mga tawo sa dili pa mo-like, kay basin ang ‘heart react’ mosangpot sa multa di ba kaha bulagan sa asawa.
