Nagpahimangno ang Department of Social Welfare and Development (DSWD) batok sa mga mikatap nga mga Facebook post nga nag-ingon nga adunay ipanghatag nga Christmas bonus alang sa mga benepisyaryo sa Pantawid Pamilyang Pilipino Program (4Ps).
Matod pa ni DSWD Assistant Secretary Irene Dumlao, dili tinuod kini nga mga post ug mahimong gihimo lamang kini sa mga online scammer aron makuha ang pribadong impormasyon sa mga benepisyaryo.
Tungod niini, hugot niyang gipahinumdoman ang publiko nga dili i-repost ang mga sayop nga anunsiyo ug magmabinantayon sa pag-click sa bisan unsang mga link.
Kini nga pasidaan kabahin sa kampanya sa DSWD nga “Tamang Tulong sa Tamang Impormasyon” (3TI), nga nagtumong sa pagpanalipod sa publiko batok sa fake news ug sayop nga impormasyon mahitungod sa mga programa sa ahensya.
Gihatagan og gibug-aton ni Dumlao nga ang DSWD dili mangayo og personal nga mga detalye pinaagi sa social media. Ang mga opisyal nga impormasyon maggikan lamang sa mga City ug Municipal Links, ug sa mga opisyal nga social media pages sa 4Ps ug DSWD.
Dugang pa niya, isip Data Protection Officer, gisunod sa DSWD ang Republic Act 10173 o Data Privacy Act of 2012, nga dili sila mag-post og mga detalye sa mga benepisyaryo.
Giawhag usab sa DSWD ang publiko nga i-report dayon ang bisan unsang anunsiyo o balita nga may kalabutan sa DSWD nga dili gikan sa opisyal nga tinubdan, aron malikayan ang pagpanglimbong ug kalituhan.
Photo courtesy: Department of Social Welfare and Development
