Gipahibalo sa Philippine National Police (PNP) niadtong Biyernes nga ang driver ni kanhing Department of Public Works and Highways (DPWH) Undersecretary Catalina Cabral gikonsidera na karon nga usa ka “person of interest” (POI) human sa kalit nga kamatayon sa opisyal niadtong Huwebes sa gabii.
Sumala sa taho sa pulisya, nakit-an nga wala nay kinabuhi si Cabral human kini gikatahong nahulog gikan sa usa ka pangpang sa Kennon Road, Tuba, Benguet, ug napalgan ang iyang lawas sa daplin sa Bued River.
Gipasabot sa PNP nga supak sa kinaiya sa tawo ang pagbiya sa usa ka VIP (very important person) sa usa ka hilit nga dapit, ilabi na nga ang iyang bag ug cellphone nabilin pa sa sulod sa sakyanan. Giklaro usab sa mga otoridad nga ang pagka-POI sa driver wala nagpasabot nga giisip na kining suspetsado, kondili gikinahanglan lang ang dugang imbestigasyon sa iyang mga lihok.
Sumala sa testimonya sa driver:
- 3:00 PM: Samtang nagbiyahe sila paingon sa La Union, nihangyo matod pa si Cabral nga ihunong ang sakyanan sa Kennon Road ug nagpabilin kini didto.
- Tungod niini, niadto ang driver sa usa ka duol nga gasolinahan.
- 5:00 PM: Pagbalik sa driver sa dapit diin niya gibiyaan ang opisyal, wala na si Cabral. Giadtoan usab niya ang hotel nga gi sak-an sa opisyal, apan wala gihapon kini didto.
- 7:00 PM: Gi-report sa driver ang pagkawala ni Cabral ngadto sa kapulisan.
- 8:00 PM: Napalgan ang lawas ni Cabral sa daplin sa Bued River, nga gibana-banang 20 metros ang gilay-on gikan sa kalsada.
Bisan pa sa makaduda nga sirkumstansya, gipahayag sa PNP nga ang pamilya ni Cabral nagdumili (refused) nga ipaubos sa autopsy ang lawas sa namatay. Sa pagkakaron, nagpadayon pa ang lawom nga imbestigasyon sa mga otoridad aron masuta ang tinuod nga hinungdan sa trahedya.
Photo courtesy: Reddit
