Subling nagpahimangno ang City Health Office sa katawhan nga mag-igmat sa paggamit og paboto atol sa kapaskuhan ug pagsugat sa bag-ong tuig.
Sa programang, Health Watch sa lokal nga panggamhanan sa Cagayan de Oro, gipasabot ni Dr Rachel Dilla, nga kung mahimo dili nalang mogamit og kusog nga klase sa mga paboto aron nga malikay sa unsa mang kadaot nga dala niini labi na ngadto sa mga kabataan.
Sumala pa ni Dr Dilla nga importante gihapon nga magselebrar sa kapaskuhan ug bag-ong tuig nga luwas ug kompleto pa ang mga tudlo ug kamot.
Samtang lakip sa pahinumdom ni Dr Dilla ngadto sa mga ginikanan nga pili-on sab ang ihatag nga mga dulaan sa mga bata. Kung masulod sa baba sa bata ang dulaan, dili nalang kini padulaan tungod adunay dakong posibilidad nga matulon kini og makadisgrasya pa hinuon sa bata.
Maghinay-hinay lang sab sa pagkaon sa mga handa nga mantikaon ug kargado sa kolesterol nga labing makadaot sa panglawas.
