Nagdesisyon ang bicameral conference committee nga ibalik sa Php889 milyones ang gahin alang sa Office of the Vice President (OVP) sa 2026 budget, nga orihinal nga kantidad nga gitakda sa Malacañang.
Sa tigom sa komite, giingon ni Nueva Ecija Rep. Mikaela Suansing, ang chair sa House committee on appropriations, nga sa bersyon sa Kamara sa General Appropriations Bill (GAB), gibutang ang badyet sa OVP sa Php733.1 milyones—sama sa nakuha niini karong tuiga.
Bisan pa niini, sumala sa counterpart ni Suansing nga si Senate finance committee chair Sen. Sherwin Gatchalian, gisugyot sa Senado ang badyet sa OVP sa kantidad nga Php889.2 milyones, nga sa ulahi gidawat ra usab sa komite.
Sa wala pa ang kasabutan niadtong Martes, niagi og taas nga deliberasyon ang alokasyon sa OVP alang sa 2026, ilabi na sa Kamara diin pipila ka mga magbabalaod ang nihangyo nga paubsan ang pondo niini tungod sa wala pagtambong ni Bise Presidente Sara Duterte sa duha ka pagdungog (hearing).
Gihatagan siya og laing higayon ug nipakita niadtong Septyembre 16, diin gisunod sa mga miyembro sa mayorya ug minorya ang tradisyon sa parliamentary courtesy, busa wala na siya gipangutana pa mahitungod sa badyet sa committee level.
Apan, wala na usab nipakita si Duterte sa plenary debate, hinungdan nga giparehas na lang unta ang badyet sa sunod tuig sa nahimong alokasyon sa OVP karong 2025.
Photo courtesy: Inquirer
