Natumba ang 24-metros nga replica sa Statue of Liberty sa gawas sa Havan megastore sa Guaíba, Brazil, kaniadtong Disyembre 15, 2025, human naigo sa kusog nga hangin tungod sa dili maayo nga panahon.
Matod sa mga awtoridad, walay natala nga naangol sa insidente human mapahawa ang mga tawo ug mga sakyanan sa palibot sa wala pa mahugno ang estruktura.
Ang replica gitukod niadtong 2020 isip kabahin sa branding sa Havan retail chain nga naila sa pagpatukod og mga replica sa Statue of Liberty sa ilang mga tindahan.
Nagpabilin nga tibuok ang konkretong base sa estatwa bisan pa nga natumba ang mismong estruktura, nga wala makaapekto sa mga duol nga mga edipisyo.
Ang pagkatumba nakuhaan og video ug mikayalap sa social media nga nakakuha sa atensyon sa tanan. Ang insidente usa lamang sa mga kadaot nga dala sa kusog nga bagyo sa rehiyon sa Rio Grande do Sul karong Disyembre.
Photo courtesy: Pilipino Mirror
