Gisita sa Commission on Audit (COA) ang ubos nga utilization sa pondo alang sa Medical Assistance to Indigent and Financially Incapacitated Patients Program (MAIFIP) sa Department of Health (DOH) niadtong 2024.
Lakip sa mga rason ang hinay o pagkalangan sa pagpagawas sa pondo, unliquidated transfers, ug ang dili pare-pareho nga pag-aplikar sa programa.
Gitumbok sa mga auditor ang Php3.013 bilyon nga wala nagamit, ilabina sa mga Center for Health Development sa Western Visayas, Central Visayas, Mimaropa, ug Eastern Visayas. Kini nahitabo tungod sa late fund transfers, kuwang nga dokumento, ug kakuwang sa mga kawani (staff).
Ang MAIFIP naghatag og pinansyal nga tabang sa mga pasyente nga dili makabayad, lakip na ang tambal, konsultasyon, tests, pinili nga mga operasyon (surgeries), ug post-hospitalization care.
Bisan pa sa isyu, gi-aprobahan sa bicameral conference committee ang Php51-bilyong badyet alang sa nahisgutang programa, mas taas kaysa Php29 bilyon sa Senado, apan adunay pagduha-duha ang pipila ka mga magbabalaod tungod sa posibleng “pork-like nature” niini ug impluwensya sa politika.
Mahitungod niini, gimandoan sa COA ang DOH ug ang mga pasilidad nga paspasan ang pagpagawas sa pondo, dugangan ang mga kawani, ipatuman ang liquidation, ug tumanon ang MAIFIP guidelines.
Photo courtesy: Dr Tony Leachon/ Instagram
