Gibutyag sa Civil Aviation Authority of the Philippines (CAAP) nga mokabat sa dul-an 1 ka milyon kon 980,000 ka airline passengers ang gipaabot nga molarga sa mga tugpahanan sa tibuok nasud karong holiday season diin mas taas kaysa sa 895,000 nga natala sa miaging tuig atol sa duha-ka-semana nga “Oplan Biyahe Ngayon sa Pasko,”kagahapong adlawa Huwebes, Disyembre 11, 2025.
Si CAAP spokesperson Eric Apolonio, sa usa ka interbyu miingon nga ang ahensya kasagarang makasinati og 7 hangtod 10 ka porsiyento nga pagtubo sa passenger volume sa matag tuig panahon sa yuletide season. Kini maoy hinungdan nga ilang gi-activate ang heightened alert status sa tanang 44 ka CAAP-operated commercial airports.
Sa heightened alert, ang tanang airport personnel anaa sa full duty status ug dili tugotan ang pagkuha og leave aron masiguro nga walay pag-undang sa operasyon ug igo ang manpower sa ground.
Matod ni Apolonio nga ang mga pasahero makapaabot og mas lig-on nga assistance services sa mga tugpahanan, lakip ang Malasakit Help Desk, usa ka one-stop table nga gi-assignan og personnel gikan sa CAAP, Civil Aeronautics Board, PNP–Aviation Security Unit (PNP-AVSEU), Office for Transportation Security (OTS), ug airline partners aron dali nilang matubag ang mga flight-related concerns.
Gi-activate usab sa CAAP ang medical teams ug nagdeploy og dugang screening personnel ubos sa OTS para sa passenger checks.
Gipahinumdoman ni Apolonio ang mga pasahero nga moadto sa tugpahanan tulo ka oras sa dili pa ang departure, ilabi na karon nga gipaabot ang pagsaka sa kadaghanon sa pasahero.
Matod niya nga kasagarang hinungdan sa dugay nga screening mao ang pagsusi og mga prohibited items sa hand-carried baggage, ug iyang gi-awhag ang mga biyahero nga makamao sa aviation security rules.
Bisan tuod ang kasamok kasagarang mahitabo sa mas dagkong hubs sama sa NAIA, Cebu-Mactan, ug Clark (nga dili CAAP ang nagdumala ubos sa PPP arrangement), ingon siya nga nagpadayon ang koordinasyon sa stakeholders aron mapun-an ang kahapsay sa proseso, ilabi na sa mga pasahero nga naggamit og online check-in ug bag-drop services.
Sa kaso nga adunay weather disruptions o technical issues, ang mga airlines nagpagawas ug sayo nga advisories aron makunhuran ang kalisod sa mga biyahero.
Photo : Caap
