Gilunsad na ni US President Donald Trump ang $1 million gold card immigration visas alang sa adunahan nga mga langyaw.
Kining gold card maghatag og “direct path” sa Citizenship alang sa mga buyer niini nga kwalipikado ug nasusi og maayo nga mga indibidwal, matod sa US President.
Ang Trump Gold Card unang gianunsyo sa sayong bahin niining tuiga. Base sa opisyal nga website sa immigration visa, ang gold card usa ka US visa nga ihatag ngadto sa nagpakita nga aduna’y katakus nga makahatag og “substantial benefit” sa Amerika.
Aron makakuha og Trump Gold Card, kinahanglan lang nga moadto sa website sa Trump Gold Card. Nahimutang sa website ang proseso diin kinahanglang magsumite og aplikasyon ug magbayad og non-refundable processing fee ngadto sa Department of Homeland Security (DHS) nga nagkantidad og $15,000.
Human mag-apply, susihon og maayo sa US Citizenship and Immigration Services ang background sa aplikante ug sa higayon nga maaprubahan, kinahanglang mohatag og contribution nga $1 million. Dayon, mahimong magamit na ang Trump Gold Card sa tanang 50 ka estado ug territories sa Amerika, ug makadawat og US residency sa “record time.”
Ang paglunsad sa gold card nahitabo taliwala sa pagpalig-on pa sa US sa ilang immigration crackdown, lakip na ang pagpataas sa work visa fees ug ang pagpa-deport sa mga walay dokumento nga migrante.
Photo courtesy: CNN
