Nagpahigayon og espesyal nga selebrasyon ang City Government of Malaybalay alang sa Health Workers’ Day niadtong Disyembre 5, nga nagpasidungog sa mga Barangay Health Workers (BHWs), Barangay Sanitary Inspectors (BSIs), Barangay Service Point Officers (BSPOs), ug Barangay Nutrition Scholars (BNSs) tungod sa ilang dedikadong serbisyo sa komunidad didto sa Barangay Linabo Grounds niaging adlaw
Sa ekslusibong pakighinabe sa Juander Radyo Malaybalay, si Kagawad Peter John Pepito, Presidente sa Federation of Health sa Malaybalay City, niingon nga kapin sa 600 ka mga representante gikan sa 46 ka barangay ang mitambong sa maong selebrasyon. Anaa usab ang mga Barangay Health Kagawad, mga barangay kapitan, ug mga opisyal sa City Health Office.
Gipasiugda ni Kagawad Pepito nga ang selebrasyon nagtumong sa paghiusa sa tanang health frontliners ug pag-ila sa ilang kahago—dili lamang sa paghatag og healthcare sa komunidad kon dili sa pagmintinar sa ilang kaugalingong panglawas ug kadasig.
Isip kabahin sa programa, usa ka Field Demonstration Competition ang gipahigayon alang sa matag distrito sa siyudad—Poblacion 1, Poblacion 2, Highway, Basakan, ug Upper Pulangi—uban ang mga pasidungog ug premyo nga gihatag sa Gobyerno sa Siyudad pinaagi ni Mayor Pabillaran ug sa konseho sa siyudad.
Ang mga doktor ug nurses nagpaabot sa ilang mga pagsaludo sa tanang mga health worker, nga nagdasig sa padayon nga panaghiusa ug dedikasyon, labi na sa umaabot nga selebrasyon sa Pasko ug Bag-ong Tuig samtang nagsilbing pahinumdom sa pasalig sa siyudad sa pagsuporta ug pag-ila sa ilang walay kakapoy nga serbisyo.
