Moabot sa 25 ka tawo ang namatay human miulbo ang dakong sunog sa Birch nightclub nga nahimutang sa baybayon sa rehiyon sa Goa sa India, Sabado sa gabii. Padayon nga giimbestigahan sa mga awtoridad ang insidente samtang nagpadayon ang mga operasyon sa pagkuha ug ebedensiya sa lugar.
Sumala sa inisyal nga mga report, ang sunog nagsugod sa pagbuto sa usa ka gas cylinder duol sa kusina hinungdan nga kini dali nga mikaylap sa tibuok bilding.
Daghan sa mga biktima mga bisita ug kawani sa nightclub ang wala dayon makagawas tungod sa kakulang sa mga agianan sa paggawas. Pipila ka mga saksi ang nag-ingon usab nga ang mga tawo nag-panic human makadungog sa pagbuto ug makakita sa dagkong siga sa kalayo.
Ang Birch nightclub nailhan nga usa sa labing gibisita nga mga lugar sa nightlife sa rehiyon, labi na sa mga turista nga gusto og kasinatian sa nightlife duol sa dagat. Tungod sa pagkapopular niini, daghang mga tawo ang napagan sa insidente nga wala makapangandam alang sa kalit nga sunog.
Gidakop dayon sa mga awtoridad ang manager sa nightclub, samtang gipalapdan ang dugang nga legal nga aksyon batok sa tag-iya ug uban pang responsable.
Gisuta na kung adunay mga paglapas ang maong establisyemento, gawas sa kamatuoran nga ang bilding wala nagsunod sa sumbanan nga mga kinahanglanon sa fire exit ug bentilasyon
via: NPR
