Giplanohan na sa Energy and Mineral Resources Ministry sa Indonesia ang mga lakang kabahin sa pagtimbang-timbang sa mga operasyon sa pagmina human sa sagunson nga pagbaha nga nasinati sa Sumatra.
Matod pa ni Dwi Anggia ang tigpamaba sa ESDM Ministry nga ang bisan unsang kalihokan sa pagmina aduna gayoy epekto sa kinaiyahan ug kini kinahanglan nga pangandaman. Una na niini, matod pa sa mga kritiko nga ang pagmina dugay nang nagbutang sa Sumatra sa kapeligrohan.
Samtang sa pikas bahin, gibutyag ni Melky Nahar, Coordinator sa Mining Advocacy Network nga ang isla sa Sumatra giisip nga sacrifice zone alang sa mineral ug coal extraction diin adunay 1,907 ka aktibong mining permits nga naglangkob sa kapin sa 2.4 milyones ka ektarya, lakip na niini ang 271 ka permit ubos sa Forest Area Use Approval scheme. Lakip sa mga naghupot ug permit mao ang PT Agincourt Resources (PTAR), operator sa Martabe gold mine sa Batang Toru Ecosystem.
Matod usab ni PTAR’s Senior Manager Corporate Communications Katarina Siburian Hardono nga sila naglihok na alang sa pagpahigayon ug mga lakang human nga miigo ang pagbaha sa Garoga Village sa Garoga/Aek Ngadil Watershed.
Photo Courtesy to: X.com
