Gipahibalo sa Department of Energy (DOE) kauban ang Department of Social Welfare and Development (DSWD) ug Energy Regulatory Commission (ERC) nga ilang gipaspasan ang pag-finalize sa polisiya nga maghatag ug 100% diskwento sa kuryente alang sa mga kwalipikadong low-income households nga konsumo sa kuryente dili molapas sa 50 kilowatt-hours (kWh) matag bulan.
Sumala sa bag-ong guidelines, gilauman nga sa wala pa magsugod ang Pasko, ang mga benepisyaryo sa Pantawid Pamilyang Pilipino Program (4Ps) awtomatikong makadawat sa “Lifeline Rate” discount, nga dili na kinahanglan pa mag-apply sa mga opisina sa electric utility.
Sa kasamtangan, kinahanglan pa sa mga 4Ps beneficiaries nga mobisita sa ilang electric cooperatives aron mag-aplay para sa Lifeline Rate, nga nakaresulta sa gamay nga ihap sa mga aplikante tungod sa kakulang sa pondo alang sa pamasahe.
Matod pa ni Energy Secretary Sharon Garin, ang tumong sa gobyerno mao ang pagtangtang sa mga babag ug pagpasayon sa proseso aron mas daghang low-income consumers ang makabenepisyo sa libreng kuryente.
Photo Courtesy to: Inquirer
