Giklaro sa Malacañang ang giingong ₱14 milyones nga uncollected expenses nga may kalabotan sa Office of the President (OP) foreign trip nga gi-flag sa COA.
Matod ni Palace Press Officer Usec. Claire Castro, ang ahensya sa Overseas Filipino Workers mao ang adunay receivables o wala mabayri nga obligasyon sa Office of the President alang sa maong biyahe.
Dugang ni Castro nga nagpadala na og pormal nga sulat ang OP ngadto sa OFW aron maproseso ang bayad ug masulbad ang isyu.
Sa pagkakaron, gibutyag ni Castro nga ang Opisina sa Presidente nakakolekta na ug kapin sa ₱7 milyones gikan sa kinatibuk-ang kantidad nga kinahanglan bayaran, ug nagpadayon pa ang koordinasyon aron makompleto ang nahabilin nga balanse.
Base sa report sa Commission on Audit (COA), kapin sa ₱14.4 milyones nga foreign travel expenses nga gi advance sa Office of the President (OP) para sa nagkalain-laing opisyal sa gobyerno ang wala pa makolekta sukad sa Disyembre 2024.
Sumala sa COA, ang maong kantidad alang sa airfare ug hotel accommodations sa mga opisyal gikan sa nagkalain-laing ahensya nga mosalmot sa presidential foreign trips sugod sa 2022.
Apil niini ang mga representante gikan sa Board of Investment BOI, BIR, DA, DOF, DFA, DICT, DILG, DOJ, DMW, DPWH, DOT, DTI, ingon man gikan sa House of Representatives, Senate, NSC, PCO, PMS, RTVM, ug TESDA.
Nagpabiling overdue ang mga receivables bisan og una na kining gibayran sa OP, base sa annual audit report sa COA.
Samtang, ang OP miinsiter nga nagpadala na kini og mga demand letter kaniadtong Abril 2025 ug padayon nilang gimonitor ang wala mabayri nga kantidad.
Photo Courtesy to:PNA
