Kapin na sa 600 ang natalang namatay tungod sa kusog nga ulan, baha, ug landslide sa tulo ka nasod sa Habagatang-sidlakang Asya, sumala sa taho sa mga opisyal niadtong Domingo. Nagpadayon ang rescue ug relief efforts alang sa liboan nga naigo ug namakwit sa nilabayng semana.
Nakarekord ang Indonesia og 435 ka tawo nga namatay, 170 sa Thailand, ug 3 sa Malaysia. Nakahatag og grabeng kadaot ang usa ka rare tropical storm sa Malacca Strait nga nagdala og kusog nga ulan ug hangin sulod sa usa ka semana.
Kapin sa upat ka milyon ka tawo ang naapektuhan. Daghang lugar ang nahimulag sa karsada, ug naguba ang telecommunications infrastructure, hinungdan nga lisod makig-kontak. Gigamit ang helicopter sa mga rescue team aron ihatod ang tabang sa mga lugar nga dili maabot sa karsada.
Sa Indonesia, pinakataas ang gidaghanon sa namatay sa Sumatra, diin tulo ka probinsya ang grabeng naigo. Hapit 406 ka tawo ang namising, ug 213,000 ka tawo ang namakwit. Aduna usay mga taho sa pagpangawat sa relief supplies tungod sa desperasyon.
Sa Thailand, 170 ang patay, 102 ang samdan tungod sa baha. Moabot sa 131 ang natalang namatay sa Songkhla Province. Hapit 18,700 ka tawo ang anaa sa evacuation centers sa Malaysia.
Kapin sa 6,200 ka Malaysian nationals sa Thailand ang na-evacuate. Nagpagawas usab ang foreign ministry og advisory sa mga Malaysian sa West Sumatra, Indonesia, aron magparehistro sa consulate alang sa tabang. Nagpadayon ang mga opisyal sa tulo ka nasod sa paghatod og tabang, pagluwas sa mga naigo, ug pagbantay sa kaluwasan sa publiko.
Photo courtesy: European Civil Protection and Humanitarian Aid Operations
