Gipahimangnoan sa Department of Labor and Employment (DOLE) ang tanang employer nga obligado sila nga mag ibayad ang 13th-month pay sa ilang mga empleyado sa dili pa moabot ang Disyembre 24.
Sumala ni DOLE Secretary Bienvenido Laguesma, walay exemption sa paghatag niini nga benepisyo tungod kay kini usa ka statutory right sa mga trabahante. Gidugang niya nga dako ang papel niini sa pagtabang sa panginahanglan sa pamilya labi na sa panahon sa holiday season.
Ang minimum nga 13th-month pay katumbas sa one-twelfth sa kinatibuk-ang basic salary nga makuha sa usa ka trabahante sulod sa tuig.
Gipahimangnoan usab sa DOLE ang mga employer nga magsumite sa ilang compliance report pinaagi sa DOLE Online Compliance Portal sa dili pa moabot ang Enero 15, 2026, nga naglakip sa impormasyon sa kompanya, ihap sa empleyado, listahan sa mga benepisyaryo, ug kantidad sa benepisyo nga nadawat.
Photo courtesy: PNA
