Naglusad na ang PhilHealth ug Social Security System (SSS) sa tagsa-tagsa nga Transparency Portal pagkahuman sa DPWH, isip kabahin sa serye sa mga transparency platforms nga giuna ni Presidente Ferdinand R. Marcos Jr. alang sa lain-laing ahensya sa gobyerno.
Sumala ni Department of Information and Communications Technology (DICT) Secretary Henry Aguda, ang mga portal sa DPWH, PhilHealth, ug SSS kabahin sa direktiba sa Presidente nga gamiton ang teknolohiya aron batukan ang korapsyon, himuon nga mas episyente ang serbisyo sa gobyerno, ug palig-onon ang pagsalig sa publiko.
Gipahibalo ni Aguda nga ang DPWH Transparency Portal gilusad niadtong Nobyembre 24 isip bahin sa kampanya para sa open government, samtang karong Martes ilunsad ang mga portal sa PhilHealth ug SSS. Matod niya nga ang mga portal usa ka importante nga lakang sa pagpalig-on sa digital governance sa nasod, nga nagtumong sa pagbukas ug pagpasayon sa pagsabot sa impormasyon bahin sa budget ug pag gastos sa gobyerno.
Gipatin-aw ni Aguda nga ang mga portal naggamit og artificial intelligence (AI) aron dali makahatag og kasayuran ug tubag sa mga pangutana sa publiko bahin sa paggamit sa pondo. Adunay usab kini visual dashboard nga nagpakita sa breakdown sa budget ug AI-powered chatbot nga makapahimangno sa English, Filipino, o Taglish.
Sumala sa DICT, mahimong ma-access ang mga portal sa websites sa DPWH, PhilHealth, SSS, ug sa open.gov.ph. Giingon pa nga sa mga mosunod nga semana, maglusad usab og transparency portals ang uban pang ahensya sa gobyerno.
Gilauman ni Aguda nga ang mga portal makatabang sa pagpalig-on sa pagsalig sa publiko, pagpugong sa anomaloso, pagpasayon sa reporting, ug pagpasiugda sa kampanya kontra korapsyon. Dugang pa niya, nagsugod na usab ang DICT sa pag-livestream sa procurement bidding isip kabahin sa pagpalapad sa transparency, nga gisundan na usab sa pipila ka lokal nga gobyerno.
Photo Courtesy to: One News
