Mikunhod ang namatay sa tipdas apan padayon ang pagsaka sa ihap sa mga impeksyon sa tibuok kalibutan, base sa taho sa World Health Organization (WHO).
Sumala sa WHO, nimenos sa 88% ang kamatayon tungod sa tipdas gikan sa 2000 hangtod 2024 pinaagi sa agresibong global vaccination campaign, nga nakaluwas ug hapit 59 ka milyon nga kinabuhi. Apan bisan pa sa dako nga pagkunhod sa pagkamatay, gibanabana nga 95,000 ka tawo—kasagaran mga bata nga wala pa’y lima ka tuig—ang namatay sa 2024 tungod sa sakit.
Narehistro usab og pagtaas ang ihap sa kaso sa tipdas, nga misaka ngadto sa 11 milyones ka mga impeksyon ning tuiga, mas taas og hapit 800,000 ka kaso kung itandi sa 2019 nga pre-pandemic level. Gipahimangnoan ni WHO Director-General Dr. Tedros Ghebreyesus nga ang tipdas mao ang “labing makatakod nga virus sa kalibutan” ug dali matakdan ang walay bakuna.
Pinakataas ang pagsaka sa Eastern Mediterranean nga adunay 86% nga pagtaas, gisundan sa Europe nga 47% ug South-East Asia nga 42%. Sa laing bahin, ang Africa nakasinati og 40% nga pagkunhod sa kaso tungod sa lig-on nga vaccination efforts.
Bisan pa sa mga paningkamot, nagpabilin nga ubos ang sakop sa pagbakuna, diin 84% ra sa mga bata ang nakauna nga dosis ug 76% sa ikaduhang dosis—lagyo sa gikinahanglan nga 95% aron mapugngan ang pagkaylap sa virus.
Gipadayag sa WHO nga ang padayon nga pondo, lig-on nga surveillance, ug unibersal nga duha-ka-dosis nga bakuna hinungdanon aron makab-ot ang tumong nga global elimination sa tipdas.
Photo Courtesy to: Mayo Clinic
