Naguol ang mga supporter ni kanhi Presidente Rodrigo Duterte human gibaliwala sa International Criminal Court (ICC) ang iyang apela para sa interim release. Nagkatigom sila sa PDP–Laban headquarters sa Manila kaniadtong Biyernes alang sa prayer vigil samtang naghulat sa mga update.
Gibarugan sa PDP–Laban nga dili flight risk si Duterte ug ang iyang edad angay unta tagaan og konsiderasyon sa humanitarian grounds. Bisan masulob-on ang mga supporter, nagpadayon sila sa paglaum nga dili pa kini katapusan sa proseso.
Nagsugod ang 24-oras nga prayer vigil alas-7 sa gabii niadtong Huwebes, uban sa mga partisipante nga mitambong pinaagi sa video conferencing gikan sa probinsya ug abroad. Gisaysay usab sa ubang miyembro ang ilang kasinatian sa liderato ni Duterte, ilabi na sa iyang giingong kontribusyon sa pag-uswag sa Davao City.
Nagpahibalo ang PDP–Laban nga magpadayon ang ilang legal nga paningkamot samtang naghulat sa sunod nga lihok sa kaso, uban sa paglaum nga makab-ot ang mas paborableng resulta sa umaabot.
Photo Courtesy to: Business Mirror
