Gibutyag ni Department of Justice (DOJ) Secretary Frederick Vida nga si Undersecretary Jose Cadiz, kinsa gitumbok ni kanhi Ako Bicol Party-list Rep Zaldy Co sa iyang video statement nga giingong nagsilbi siyang bagman ni Presidente Ferdinand Marcos Jr.
Matod sa kalihim, nagsugod ang leave ni Cadiz niadtong Nobiyembre 21 apan nagpabilin gihapon siyang undersecretary sa maong departamento.
Giklaro usab niya nga sama niya, si kanhi DOJ Secretary Jesus Crispin Remulla wala hatagi og assignment ni Cadiz nga mohimo og interview o mo-imbestigar sa mga indibidwal nga may kalabotan sa kontrobersyal nga flood control projects.
Busa hangtod karon wa pa maapil si Cadiz sa nagpadayong imbestigasyon sa maong ahensya. Sa dihang gipangutana kung giimbestigahan ba sa DOJ si Cadiz human sa pamahayag ni Co, si Vida niingon nga walay hurisdiksiyon ang DOJ sa pagpasaka og kaso batok sa undersecretary.
Matod niya nga ang bisan unsang criminal o administrative liability ubos sa hurisdiksyon sa Office of the Ombudsman tungod kay kini ang piskal ug maka imbibistigar sa mga public servants.
Kahinumdoman nga sa video statement nga giluwatan ni Co niadtong Nobiyembre 14, niingon siya nga mitambong siya sa tigom sa ig-agaw sa presidente, kanhi House Speaker Martin Romualdez, ug Cadiz atol sa budget deliberations niadtong Nobyembre sa miaging tuig.
Atol sa tigom, giingong nitug-an si Cadiz kang Co nga nasuko ang presidente tungod sa giingong nawala nga “remittances.” Gimandoan usab siya nga ihatod ang ₱1 bilyones ngadto sa Presidente, diin si Romualdez giingong nagmando kaniya nga dad-on ang kuwarta sa 30 Tamarind Street, South Forbes Park aron personal nga ihatod ngadto sa presidente.
Hinuon, ang Malacañang sa sayo pa nanghimakak sa mga pasangil ni Co.
Photo Courtesy to: Rappler
