Nagpagula og pahimangno ang Philippine Embassy sa Japan ngadto sa mga Pilipino nga nagpuyo ug nagbyahe sa nasod human ideklarar sa Japanese government ang national flu alert, tungod sa padayon nga pagsaka sa kaso sa influenza.
Gipaabot sa embahada ang pahimangno sa publiko nga mag-amping sa ilang palibot ug panglawas, ilabi na sa panahon nga dali ang pagkalat sa sakit. Giingon sa embahada nga kung makasinati sa grabe o dili maayo nga sintomas, kinahanglan nga moadto dayon sa doktor o sa pinakaduol nga medical facility alang sa tukmang pagtambal.
Alang sa mga Pilipinong nagplano nga mo adto sa Japan, gi-awhag sa embahada ang pagkuha og travel insurance aron masiguro ang proteksyon sa posibleng panginahanglan medikal samtang nagbyahe sa nasod.
Gidugang sa embahada nga importante usab ang pagsunod sa mga basic health protocols, sama sa kanunay nga paghugas sa kamot, pagsul-ob sa face mask sa daghang tawo nga lugar, paglikay sa kontak sa mga tawo nga adunay ubo ug sip-on, ug ampingan ang immune system pinaagi sa maayong nutrisyon ug igo nga tulog.
Gipaambit sa Philippine Embassy sa Tokyo nga magpabilin silang alerto ug magsubay sa mga update gikan sa lokal nga kagamhanan ug health authorities aron maprotektahan ang Filipino community sa Japan.
Photo courtesy: CMQ
