Anaa na sa pinaka-ulahing lakang ang Valencia City sa pagtukod sa pinakaunang pampublikong ospital sa syudad, nga pagatawgon ug Valencia City Good Samaritan General Hospital.
Sumala ni Konsehal Sasang Cadigal-Recla, Committee Chair sa Health, giandam na ang budget nga mokabat og PHP 200 milyon, nga kuhaon pinaagi sa loan gikan sa Landbank of the Philippines, alang sa renovation o construction sa maong ospital.
Matod pa niya, itukod kini sa kasamtangang City Health Office nga nahimutang sa Sito Hagkol, duol sa Robinsons Mall boundary, Barangay Bagontaas. Ang pagsugod sa proyekto gipaabot pagkahuman sa signal gikan sa Department of Health sa tuig 2026.
Gidugang pa sa konsehal nga andam na ang syudad sa tanang kinahanglanon sa pagtukod sa ospital, lakip na ang city ordinance, standard nga lugar, land preparation, ug building construction plans.
Ang Valencia City Good Samaritan General Hospital usa ka public hospital nga giingong libre alang sa tanan nga Valenciano basta adunay PhilHealth, samtang ang dili taga-Valencia adunay gamay nga bayranan.
Ang proyekto gilauman nga makahatag og mas lapad nga access sa medical services sa mga residente ug makatabang sa pagpalig-on sa healthcare system sa syudad.
via: CHO VALENCIA GALLERY
