Giapil sa Opisina sa Ombudsman si Presidente Ferdinand “Bongbong” Marcos Jr. sa motu proprio nga imbestigasyon sa giingong mga anomaliya sa mga proyekto sa pagkontrol sa baha, human gilambigit ni kanhi Ako Bicol Party-list Representative Zaldy Co ang pipila ka taas nga opisyal sa gobyerno.
Gikumpirma ni Ombudsman Jesus Crispin “Boying” Remulla nga ang tanang indibidwal nga gihisgutan ni Co sa leaked online video content wala gibalewala ug mahimong ipaubos sa hingpit nga pagsusi. Sumala ni Remulla, ang mga giimbestigahan naglakip sa Presidente, kanhi House Speaker Martin Romualdez, miresign nga Budget Secretary Amenah Pangandaman, ug kanhi Presidential Legislative Liaison Office Undersecretary Adrian Bersamin.
Gihagit usab sa Ombudsman si Co nga mobalik sa Pilipinas aron pormal nga manumpa sa iyang pamahayag, labi na kay adunay giingong direktang mga alegasyon batok sa Presidente.
Mahitungod sa posibilidad nga ang Presidente mag-atubang og kaso sama sa gross negligence, miingon si Remulla nga dili pa panahon nga hisgutan kini samtang ang imbestigasyon anaa pa sa sinugdanan nga mga yugto.
Samtang nagpadayon ang proseso, gisugdan na usab ang mga kaso nga gisang-at batok kang Co ug uban pang mga akusado, lakip ang malversation, graft, ug conflict of interest. Niadtong Nobyembre 19, usa ka espesyal nga raffle ang gihimo aron mahibal-an kung unsang dibisyon sa Sandiganbayan ang modumala sa matag kaso.
Photo courtesy to: PCO
