Kapin sa 170 ka mga bilding ang nangaguba ug naugdaw sa usa ka dakong sunog nga milamoy sa distrito sa Saganoseki, Oita City, sa isla sa Kyushu, Japan. Kini giisip nga pinakadako nga sunog sa kasyudaran sa nasud sulod sa halos 50 ka tuig.
Sumala sa report, ang sunog nagsugod niadtong Martes sa gabii, mga alas 5:43 sa hapon (lokal nga oras), sa usa ka lugar duol sa pantalan sa pangisdaan sa Saganoseki. Ang kusog nga hangin maoy hinungdan sa paspas nga pagkaylap niini, resulta nga nakaabot sa duol nga mga kalasangan ug nalakip ang usa ka hilit nga isla nga kapin sa 1 kilometro gikan sa baybayon.
Gibanabana nga mikaylap ang sunog og 48,900 metro kwadrado, nga katumbas sa gidak-on sa pito ka mga soccer field. Kapin sa 175 ka residente ang gipabakwit ngadto sa temporaryong mga kapasilongan.
Usa ka 70-anyos nga lalaki ang gitaho nga nawala, samtang usa ka patay nga lawas ang nakit-an sa nasunog nga balay. Samtang usa ka 50-anyos nga babaye ang gidala sa ospital nga adunay minor nga paso.
Kapin sa 200 ka mga bombero ang nagtabang aron makontrola ang sunog. Aktibo usab ang Japan Ground Self-Defense Force, nga naglunsad og aerial firefighting gamit ang mga helicopter aron mapugngan ang pagkaylap niini.
via: CNA
