Gidepensahan ni US President Donald Trump si Saudi Crown Prince Mohammed Bin Salman kalabot sa pagpatay sa Saudi journalist nga si Jamal Ahmad Hamza Khashoggi.
Kahinumduman, gi-assassinate ang tigbalita sa Istanbul kaniadtong Oktubre 2, 2018 sa mga ahente sa gobyerno sa Saudi sa mando sa Saudi Crown Prince, base sa gipagawas nga U.S. intelligence report kaniadtong Pebrero 2021.
Sa unang pagbisita sa Saudi Crown Prince sa White House kaniadtong Martes, Nob. 18 (eastern time) human sa pito ka tuig, nakigpulong siya kang US President Donald Trump.
Gidepensahan kini ni Trump sa dihang gipangutana ang Crown Prince bahin sa pagpatay kang Khashoggi, og walay alamag ang Crown Prince bahin niini.
Gibara usab ni Trump ang journalist nga nangutana sa crown prince kalabot sa pagpatay kang Khashoggi, ug sa September 11 attack, diin nagpahayag og kasuko ang mga pamilya sa mga biktima sa pagbisita sa crown prince tungod sa giingong papel niya sa pag-atake.
Samtang, gitubag na usab sa Crown Prince ang mga alegasyon batok kaniya, diin nagpahayag kini og pakighiusa sa kasakit nga gibati sa mga pamilya sa September 11 attack sa Amerika. Giakusahan niya si Osama bin Laden nga gigamit ang Saudi aron gub-on ang relasyon tali nila sa Amerika.
Pag-abot usab sa gipatay nga journalist, nagpahayag usab og kasubo ang Crown Prince ug miingon nga masakit paminawon nga namatay ang usa ka indibidwal nga walay hinungdan. Matod niya, sakit og usa kini ka dakong sayop. Gibuhat usab nila ang tanang ligal nga lakang sa imbestigasyon sa kaso og gipausbaw pa ang sistema sa Saudi aron maseguro nga dili na masubli pa ang samang insidente.
Kahinumduman, una nang gihimakak sa Crown Prince ang pag-mando nga patyon ang journalist apan giako niya ang responsibilidad isip de facto ruler sa Kingdom of Saudi Arabia.
Photo courtesy to: AP News
