Subling gihangyo sa Office of the Senior Citizens Affairs (OSCA) ang mga botika-parmasiya nga walaon na ang booklet isip rekisitos sa mga senior citizens nga maka-avail sa diskwento sa ilahang gikinahanglan nga mga tambal ug uban pang medical supplies.
Sa pamahayag ni OSCA head Capt. Douglas Dabatian, iyahang gihangyo ang mga nanag-iya, tigdumala ug mga tindera sa botika/pharmacy nga motuman sa mando sa Department of Health pinasikad sa DOH administrative order 2024-0017 ug Food and Drug Administration circular no. 2025-005 diin pagwagtang sa purchase booklet isip rekisitos aron makatagamtam sa 20% senior citizens discount sa tambal ug uban pang medical supplies sa tanang pharmacies.
Saysay pa ni Dabatian, dakong kahasol na kini sa mga tigulang kung pangitaan pa sa ilahang mga purchase booklet labi na kadtong uban nga anaa na sa parmasiya apan kinahanglan pang balikan ang ilahang mga booklet nga nahabilin sa ilahang panimalay.
Dugang pa niini nga gikinahanglan lang ang pagdala sa senior citizens nga identification card o uban pang valid government-issued ID nga pamatuod nga 60 anyos na pataas ug Filipino citizen.
Photo courtesy: City Information Office
