Gimandoan sa Department of Labor and Employment (DOLE) og inspeksyon ang 98 ka business process outsourcing companies nga giakusahan sa pagbutang sa peligro sa ilang mga empleyado atol sa super typhoon Uwan, sumala sa reklamo sa BPO Industry Employees Network (BIEN Pilipinas).
Daghang empleyado napugos nga moadto sa opisina ug gihapon gipatrabaho bisan pa man sa baha, power outage, ug delikado nga kondisyon sa panahon sa bagyo. Ang uban gisilotan tungod kay nagpabilin lang sa balay imbis nga moadto sa opisina.
Gisiguro sa DOLE nga tanang kompanya hatagan og higayon nga ipresentar ang ilang side ug pagkahuman matino ang sunod nga lakang, samtang magpadayon ang inspeksyon aron masiguro ang kaluwasan sa mga trabahante.
Ang BIEN nangayo og dali nga inspeksyon, automatic suspension sa on-site work sa mga lugar nga apektado sa bagyo, ug kasiguroan nga dili mawala ang sweldo o maatubang og disiplina ang mga trabahante nga mopili sa safety.
Sa laing bahin, giingon sa IT and Business Process Association of the Philippines (IBPAP) nga ilang mga miyembro naghatag og flexibility sa trabahante nga mag-onsite o remote work depende sa kahimtang ug gitagaan og dugang benepisyo ang mga mopili nga mo-report sa opisina.
SOURCE: ABS CBN NETWORK
