Gipahamtang og 11 ka tuig ug 8 ka bulan nga pagkabilanggo sa UK ang 47-anyos nga Chinese woman nga si Zhimin Qian, nga nailhan sa media isip “cryptoqueen,” human siya madakpan sa pag-scam sa kapin sa 128,000 ka tawo sa China pinaagi sa usa ka Ponzi scheme.
Narekober sa mga pulis ang 61,000 Bitcoin gikan sa iyang mga devices, nga nagrepresentar sa labing dako nga cryptocurrency seizure sa UK, kantidad kapin sa £5 billion ($6.6 billion).
Sumala sa mga otoridad, misugod si Qian sa pyramid scheme gikan 2014 hangtod 2017, diin daghan sa iyang mga investors ang nagbutang sa ilang life savings ug pensions. Sa dihang nahibal-an sa mga otoridad sa China, milayas siya padulong UK gamit ang peke nga identidad ug nagpuyo sa luxury nga estilo sa kinabuhi, nag-abang og mahal nga balay ug nagpalit og mahalong alahas ug relo.
Matod ni Judge Sally-Ann Hales nga si Qian mao ang mastermind sa krimen gikan sinugdanan hangtod katapusan, ug ang iyang motibo mao ang kahakog.
Kauban sa pagkabilanggo si Seng Hok Ling, 47-anyos nga Malaysian, nga nakatabang sa pagbalhin ug pagproseso sa iligal nga kwarta pinaagi sa Bitcoin, ug nahukman og 4 ka tuig ug 11 ka bulan nga pagkabilanggo.
SOURCE: AP NEWS
