Giampo sa lider sa Simbahang Katoliko nga si Papa Leo XIV ang mga biktima sa Super Bagyong Uwan nga mihapak sa Pilipinas, ilabi na sa Luzon.
Diin unom na ang kumpirmadong namatay ug sobra usa ka milyon ka residente na ang mibakwit gikan sa mga ubos nga dapit sa wala pa mo-landfall ang bagyo sa probinsya sa Aurora niadtong Dominggo sa gabii.
Atol sa iyang sinemana nga pag-ampo sa Angelus sa St. Peter’s Square, giingon sa Santo Papa nga iyang giampo ang mga namatay ug ang ilang mga pamilya, ingon man ang mga naangol ug nawad-an og puy-anan.
Dungan niini, nanawagan usab ang Santo Papa alang sa paghunong sa mga kagubot ug panag-away sa nagkalain-laing bahin sa kalibutan, ug giawhag ang mga nasud nga ipadayon ang kalinaw, ug negosasyon imbes nga kapintasan.
Nagpasalamat usab si Pope Leo sa tanan nga padayon nga naningkamot sa pagpalambo sa kalinaw sa mga rehiyon nga apektado sa gubat.
Photo courtesy: PBS
