Giila sa Guinness World Records si Ross Palermo, usa ka 92-anyos nga lolo gikan sa Pennsylvania, U.S., isip labing tigulang nga tubero sa kalibutan. Bisan pa sa iyang edad, aktibo gihapon nga nagtrabaho si Palermo. Nagsugod siya sa pagtrabaho isip tubero niadtong 1951.
Ang aplikasyon alang sa world record gisumite sa iyang anak nga si Vince Palermo. Matod ni Vince “Ang panaw sa akong amahan isip usa ka tubero usa ka panaw sa paglahutay ug paglaum. “Nagtuo kami nga kini magdasig sa mga tigulang nga trabahante”
Si Ross, ang anak sa mga Italyanong imigrante, nagsugod sa pag-plumbing pagkahuman sa high school. Kini nahunong sa makadiyot sa dihang siya gi-draft sa U.S. Army atol sa Korean War (1953). Niadtong 1965, gitukod niya ang iyang kaugalingong kompanya sa pag-plumbing, ang R&G Plumbing, Inc.
Hangtod karon, ang iyang mga kliyente nahingangha sa iyang trabaho. Si Marty Marra, usa ka kliyente niya sulod sa 20 ka tuig, nahingangha sa kahanas ug kahibalo ni Ross sa pag-plumbing. Minyo si Ross nga adunay lima ka anak, 10 ka apo, ug tulo ka apo sa tuhod.
Photo Courtesy:post-gazette
